Ligue Haïti
Broutons hors du territoire national les Impérialistes Français,Américains,Canadiens et leurs laquais tapis à travers la Minustha

Accueil > National > Kolektif Mobilizasyon Pou Dedomaje Viktim Kolera yo HYPERLINK (...)

Kolektif Mobilizasyon Pou Dedomaje Viktim Kolera yo HYPERLINK "mailto:komodevik@yahoo.fr" komodevik

lundi 13 février 2012, par Guy Numa, Yves Pierre-Louis

Pozisyon Kolektif la sou vyòl sòlda MINISTA yo fè sou jèn 14 lane Roudy Jean nan Gonayiv ak sou visit konsèy sekirite a ap fè nan kad okipasyon peyi a

Yon lòt fwa ankò, sòlda MINISTA yo krache sou diyite pèp ayisyen an. Apre pil ak pakèt zak kriminèl MINISTA fè nan peyi a tankou : kadejak sou tifi ak ti gason, kolera li pote, pann moun nan Okap, maspinay ak represyon, fòs okipasyon an kontinye ap imilye pitit pèp la. Nan dat 28 jiyè 2011, nan okazyon 96 lane premye okipasyon ameriken nan peyi a, sòlda MINISTA maspinen epi fè kadejak sou jenn gason Jhony Jean nan Pòsali. Malgre zak sa a swadizan devan lajistis nan peyi Irigwe, sòlda MINISTA yo kontinye ap fè zak kriminèl sa yo. Sa ki fè, sòlda MINISTA nan Gonayiv fè kadejak sou jenn gason Roudy Jean, sou plas endepandans lan nan Gonayiv, nan mwa janvye 2012 la.

Kolektif la kwè, li lè li tan pou tout moun ki gen diyite nan peyi a di non, sètase. Kolektif la bat bravo pou rezolisyon senatè yo pran pou mande Nasyonzini leve iminite sòlda sa yo. Men tou, Kolektif la kwè, leve iminite sòlda yo pa sifi. Palmantè yo dwe sispann fè tèt yo konplis prezans MINISTA nan peyi a, nan reyalize pwojè ansanm ak MINISTA epi nan defini ajennda lesjislatif sou patwonaj MINISTA, tankou jan sa te fèt sou gouvènman Preval-Michèl Pyèlui a, nan mwa desanm 2009. Depite ak senatè yo dwe sonje palman an se youn nan enstitisyon ki gen responsablite nan defann dwa granmoun peyi a. Kidonk, palman dwe egjije pou MINISTA kite peyi a, si palmantè yo vle respekte tèt yo ak rezolisyon yo te pran apre kadejak Pòsali a.

Kolektif la aprann, tout 15 manm konsèy sekirite Nasyonzini an ap nan peyi a soti 13 pou rive 16 fevriye 2012. N ap tou mande konsèy sekirite a, pou li mete fen san pèdi tan, nan mada fòs kadejakè ki rele MINISTA a. Se nan

menm lespri sa a, Kolektif la mande :

Pou Nasyonzini leve iminite tout sòlda ki fè move zak nan peyi a epi remèt yo bay lajistis (menmsi jistis la fin pouri menmjan ak leta a)
Pou palman an mande pouvwa anplas la pote akò syèj 9 jiyè 2004 la devan palmantè yo, yon mannyè pou yo ka voye akò sa a jete nan poubèl listwa
Pou fòs okipasyon an kite peyi a san pèdi tan
Pou tout viktim kolera, asasina, kadejak, vyòl ak maspinay MINISTA fè yo, jwenn jistis ak reparasyon nan men nasyonzini.

Kolektif la pwofite okazyon sa a pou li kore kare bare, manifestasyon 2 òganizasyon manm Kolektif la (PEVEP ak MOLEGAFH) lanse pou madi 14 fevriye a, nan okazyon vizit konsèy sekirite a. Kolektif la mande tout fanm ak gason konsekan, militan nan katye popilè yo, ouvriye, peyizan, ti machann, elèv, etidyan, pwofesè, jounalis, elatriye…, pou yo pote kole nan manifestasyon sa a k ap kòmanse nan Fònasyonal pou al bout nan zòn Channmas.

Aba MINISTA ! Aba kadejakè !

Viv yon Ayiti granmoun !

Pou Kolektif la :

Yves Pierre-Louis Guy Numa

Répondre à cet article